फागुन ६, रामेछाप । ७१ औं राष्ट्रिय प्रजातन्त्र दिवसको अवसरमा नेपाल प्रज्ञा प्रतिष्ठानद्धारा आयोजना गरेको राष्ट्रिय कविता प्रतियोगितामा रामेछाप सुनापती गाउँपालिका–४ बेथानका विक्रम पवन परियार प्रथम भएका छन् ।
त्यसैगरी कविता प्रतियोगीतमा तनहुका गोविन्दगोपाल खतिवडा द्धितीय र खोटाङका तेज राईले तृतीय स्थान ग्रहण गर्न सफल भएका छन् ।
विक्रम पवन परियारले लेखेको ‘फर्क अब आफ्नै देश’ शीर्षकको कविता प्रथम भएको प्रज्ञा प्रतिष्ठानद्धारा गठित मूल्याङ्कन समितिले बताएको छ । भोली प्रतिष्ठानले प्रथम भएका परियारलाई आयोजना गरेको कार्यक्रममा पचास हजार रुपैयाँ नगदसहित प्रमाणपत्र प्रदान गर्नेछ ।
नेपाली सेनामा कार्यरत परियार कविता विधामा यसअघि पनि पुरस्कृत भइसकेका छन् । परियारका २०६८ सालमा ‘जलेको मुटु’ गजल संगह, २०७१ मा खण्डकाव्य, पाँच वटा गीत रेकर्ड भएका छन् ।
बिहीबार ६ फाल्गुन, २०७७
