कार्तिक १, काभ्रेपलाञ्चोकको पनौतीमा सवारी दुर्घटना हुँदा दशैं मनाउन घर जाँदै गरेकी रामेछापकी युवतीको मृत्यु भएको छ ।
मन्थली नगरपालिका १२ की २० वर्षीया रमिला बुढाथोकीको मृत्यु भएको हो भने चार जना घाइते भएका छन् । आज बिहान पनौती नगरपालिका ५ सुन्दर बस्तिस्थित काठमाडौँबाट पूर्व इलामतर्फ जाँदै गरेको बा ६४ प १७७२ नम्बरको मोटरसाइकललाई सोही दिशातर्फ जाँदै गरेको बागमती प्रदेश ०२–००१ ज ०२९८ नम्बरको इलेक्ट्रिक भ्यानले ठक्कर दिई दुर्घटना भएको हो । दुर्घटनामा परी गम्भीर घाईते भएकी रमिलालाई धुलिखेल अस्पताल पुर्याउनसाथ चिकित्सकले मृत घोषणा गरेका थिए ।
दुर्घटनामा परी ४ जना घाइते भएका छन् । घाइते हुनेहरुमा रामेछापकी मन्थली नगरपालिका–१२ की पुष्पा तामाङ, लिखुतामाकोशी गाउँपालिका ६ का ५१ वर्षीय टंकप्रसाद दाहाल, इलाम थाकथुम गाउँपालिका ३ का ४० वर्षीय रामकुमार राई र उनकी श्रीमती ३९ वर्षीया प्रविशा सुनुवार रहेका छन् ।
बुधबार १ कार्तिक, २०८०
